Mota ta kauce daga hanya tayi kan Masallata a filin Idi, mutane 2 da Dansanda 1 sun mutu

Wasu masallata sun rasu sakamakon hatsarin mota daya faru a filin Idi - Jama'an sun mutu ne yayin da wata motar katako ta kauce ta yi kan masallata Akalla mutane 2 ne suka mutu yayin da wata motar katako ta afka cikin taron Masallata yayin da suke gudanar da Sallar Idi a garin Ijebu Igbo na jihar Ogun. Jaridar Daily Trust ta ruwaito wani dansanda guda ya mutu sakamakon harbi a lokacin da rikici ya barke a unguwar sanadiyyar hatsarin daya auku, hakan ya jefa al’ummar garin cikin alhini. Wani shaidan gani da ido ya tabbatar ma majiyar NAIJ cewa hadarin ya faru ne sakamakon tsinkewa birkin motar, wanda hakan ya raunata jama’a da dama, tare da lalata motoci da dama.

Shaidan ya bayyana yadda dansandan ya rasu, inda yace bayan aukuwar hatsarin, sai jama’an yankin suka fara zanga zangar nuna bacin rai, a wannan lokacin ne yansanda suka fara harbin mai kan uwa da wabi, a haka ne harsashin ya sami daya daga cikinsu, wanda nan take ya mutu.

©Naij